Saturday, May 27, 2006

محتارة :(


فجأة وبدون مقدمات حصلت على عرضين للعمل بعد ماكنت اطر من الديوان طرارة الحين صار عندي عرضين لا ولي حرية الاختيار لمكان العمل
العرض الاول من مستشفى المواساة:
المميزات
مكان العمل ممتاز جدا
المعاش اكثر من الحكومة بمئة دينار
المسؤؤل دكتور هندي طيب جدا جدا
نوعية الشغل وايد حلوة ومافيها روتين يومي
المساوىء:
الدوام شفتات يعني في مرات يكون الدوام لي الساعه 11 بليل واذا كان الشفت صباحي يكون الي الساعه 3
مدير المستشفى بحد ذاته يعتبر نقطة سلبية
السالمية بعيدة عن بيتنا وايد وتخيلوا اني ساعات راح اكون طالعة بلليل متاخر
الشغل ماراح يكون بمجال دراستي ابدا
ماراح اتمتع باجازات العيد والعطل الرسمية حالي حال خلق الله
في دوام يوم الخميس واحيانا الجمعة
العرض الثاني من وزارة الصحة:
المميزات:
الدوام الي الساعة الواحدة والنصف فقط
عندي حرية الاختيار للعمل في اي مستشفى من المستشفيات في اي منطقة
الدوام سبهللة يعني فلاتي يعني اداوم على كيفي يعني اجازات العيد والاجازات الرسمية كلها مضمونة والاستئذانات على ماله والي " كثيرة جدا"ء
المكان اللي اخترته اختي ورفيجاتي كلهم يشتغلون فيه ويمنا مجمع تجاري كبير و سووووووق
المسؤول رفيج ابوي
نوعية الشغل _ان وجد_ تتوافق تماما مع دراستي
المساوىء:
روتين قاتل, ذباح و فتاك
مكان العمل غير مناسب للكائنات الحية ماعدا الكائنات اللاهوئية_ اي التي لاتحتاج الي الهواء الجوي لتعيش_وبدون مبالغة
قهوة وشاي وسوالف ومناجر وهواش وخناق طوال اليوم بسبب انعدام الشغل
مواقف السيارات غير متوفرة بعد الساعة 7 صباحا
انعدام التقدير للموظف المجتهد وتكريم وترقيه الموظفات الحسناوات او الجياكر اللي عندهم واسطات
يجب توقيع تعهد بعدم الانتقال من هذا المكان بصفة دائمة يعني الي التقاعد وهذا قانون جديد فريش على حظي
اشرايكم انتوا؟؟؟

Friday, May 19, 2006

في قيد التطوير


تطور في هوايتي التصويرية بعد زيارة لمعارض التصوير في بيت لوذان والمارينا كرسنت
وبعد ماتعلمت استخدم برنامج الفوتوشوب
_________________________________________
هذا مبنى قديم خلف مركز السكري اللي عالبحر والمفروض انهم يحافطون عليه ويخلونه كتراث او معلم سياحي او حتى متحف لكنهم قاعدين يهدمون ليش؟ مادري

Friday, May 12, 2006

الكويت تناديكم



احنا الخطاوي الأكيدة على دروب الأمل مثل الرياح العنيدة ما قط عرفنا الملل
ملاحظة: شاركوا بضمير ومن اجل الكويت فقط
ما قط: ابدا للنفي

Wednesday, May 03, 2006

تجارة


تعرفون مصنع او شركة اقدر اسوي عندها علب ورقية واكتب عليها اي شي او قوارير _ حلوة قوارير_ للعطور
من تصميمي او اكياس ورقية خاصة؟؟؟ في الكويت طبعا :)

Monday, May 01, 2006

سياسة


جلست اتأمل شعيرات السجادة الخضراء في غرفة الجلوس
كثيرة
متطابقة
متراصة
متماسكة
احاول التفريق بينها بلا جدوى
كل مجموعة تميل باتجاه مختلف ولكن الكل يتمسك بقاعدة سميكة
احضرت مكنستي الخشنة احاول, علها_ شعيرات سجادتي_ تفترق حين اضغط عليها او حين اشكل خطوطا عميقة بينها
ولكن عبثا
استخدمت_ تلك الشعيرات_ مكنستي لتتخلص من قاذورات صغيرة كانت تحاول الوصول الي القاعدة
ليتنا كنا سجادة خضراء في غرفة جلوس احدهم
ب.س: الصورة في السوق (المسقف) في سوق الكويت