Tuesday, October 25, 2005

اتفقا على ان يختلفا


تناقض غريب عاشته الكويت ولمدة ثلاثة ايام متتالية دعوني اقص عليكم الاحداث التي مرت بها هذه الايام الثلاث:
يمر احد الاخوان السنة بعد صلاة العشاء بجانب اي مسجد من المساجد التابعة للسنة في الكويت فيرى الازدحام الشديد والناس تتهافت لكي تجد لها مكان بين جموع المصلين يصلون صلاة التراويح وبعدها صلاة القيام خاشعين تمتليء اعيهنم بدموع الايمان والخوف من الرحمن والدعاء كل حسب حاجته, وختمة القرآن المباركة التي تتلى بصوت الشيخ العفاسي في مسجد الدولة الكبير و ازدحام الناس على هذا المسجد بالذات الكل يريد الاستمتاع بهذا الصوت الرخيم العذب والذي اسميته بالصوت الملائكي الكل ينشد الحصول على الثواب في هذا الشهر الكريم الكل يتلهف لعبادة ربه واقامة سنة نبيه, يمر هذا الاخ هناك فيقول ماشاءالله كلنا في الكويت من اهل السنة والحمدلله.
وفي نفس الليالي وفي نفس الوقت يمر احد الاخوان الشيعة ايضا بعد الصلاة ولكن ليس العشاء بل صلاتي المغرب والعشاء مجتمعتين يمر هذا الاخ على احدى الحسينيات التابعة بالطبع للشيعة في الكويت فيرى الازدحام الشديد والناس تتهافت لكي تجد لها مكان بين جموع المعزين بوفاة امير المؤمنين علي بن ابي طالب وايضا تتمتليء اعينهم بدموع الايمان والخوف من الرحمن والدعاء كل حسب حاجته, واعمال شهر رمضان من ادعية وصلوات والناس تتهافت على مسجد معين ايضا للاستمتاع بصوت الشيخ القاريء ذلك العذب والرخيم الكل ينشد الحصول على الثواب في هذا الشهر الكريم الكل يتلهف لعبادة ربه واقامه سنة نبيه. يمر هذا الاخ فيقول ماشاءالله كلنا في الكويت من الشيعة والحمدلله.
حدثين متشابهين من الخارج مختلفين من الداخل الكل يعتقد بربه بطريقته والكل يرجو الاثابة وحسن الخاتمة الكل يعمل ويجتهد ايمانا منه بمعنقداته.
وبعد انتهاء الاعمال يلتقي هذان الاخوان السني والشيعي فهما صديقان كل منهما يحدث الاخر بما شاهد وما عمل وما سمع ايضا يختلفان في وجهات النظر وفي اساسيات العقيدة والايمان كل منهما يصغي للاخر ويحسن الاستماع اليه بعد ذلك يتسحران مع بعضهما ويتحدثان في شتى الامور, ومن ثم يودع كل منهما الاخر ويذهب كل واحد الى بيته وفي قلبه حب لصديقه وشوق لصلاة الغد.
الحمدلله على هذه النعمة

Saturday, October 22, 2005

بالعربي ؟؟؟؟ tag شنو ترجمة





Tagged by mashi_97 and mother courage: wWoOoOoOoOoWw
heeeyyyyyaaaaaaaa :)
wanasa
its my first time and I'm so so so so happy :)
( I don't know why but I'm happy)
lets start :
Seven things I plan to do:
1. اتوظف بسرعة لاني مليت من القعدة بالبيت.
2. ازور عمتي اللي صارلي اكثر من سنتين مو شايفتها.
3. اختم القرآن هالشهر انشالله
4. Gain some weight
5. Take photoshop classes
6. اخذ دورة انجليزي
7. بس بعد ماعندي شي :)
Seven things I can do:
1. Cook delicious fo6or :)
2. Live without TV
3. اشبك عالنت لمدة 24 ساعة ( قبل الزواج)
4. انام لمدة 24 ساعة ( هم قبل الزواج)
5. Go shopping everyday
6. اسوي 3 اشياء بوقت واحد :) (بعد الزواج)
7. اقعد مع بنتي بغرفة وحدة لمدة ثلاث ساعات بدون ما اعصب :)
Seven things I can't do:
1. اعيش بدون زوجي وبنتي الجميلة
2. انام لمدة 6 ساعات متواصلة
3. اقرى كتب سياسة واقتصاد
4. Make friends easily
5. ادرس والغرفة معفوسة
6. اسوق سيارتي بسرعة تقل عن 100 كلم/ساعة
7. اقعد مع بنتي بغرفة وحدة لمدة ثلاث ساعات وخمس دقايق بدون ما اعصب
Seven things I say most often:
1.ونـــــــــــــــــــــــــــــــــــاسة
2. يا سلام (لما اكون معصبة او مو موافقة عالموضوع)
3. روحي نامي وراج مدرسة حق بنتي ( نشيد المساء)
4. والله حالة ( بدال والله طرطرة)
5.مال طق ( هذي اقولها بدال شكرا حق الناس القراب علي وايد)
6. شلون مكياجي ؟؟ حلو؟؟؟
7. ويييييييييييييييييييييييييييي
Seven people I want to pass this tag to:
7.and anyone who haven't been tagged before ... don't feel free to tag urself looooooooooooool at'3shmar
في ناس وايد عزيزين علي كان ودي اذكرهم باللستة بس بعضهم :
tagged before by others
وبعضهم
are tagging me
وسامحوني اذا نسيت احد منكم

Monday, October 17, 2005

قرقيعان ......بس بشرط

قرقيعان وقرقيعان بيت قصير ورميضان عادت عليكم صيام كل سنة وكل عام الله يخلي بنتي الله يخلها لامها عسى البقعة ماتخمها ولا تواسي على امها
سلم ولدهم ياله خله لامه ياله
ويص ويص في بيتكم جعاميــــ...... :)
بما ان احنا ساكنين في منطقة اكثر سكانها عيايزو شياب عشان جذي القرقيعان عندنا مو متطور نفس باجي المناطق يعني وين و وين تلاقي بيت يعطونك حلاو وكاكاو يديد مو محزر , وفي بيوت حاطين خردة مع المخلط ( المكسرات) عشرينات وخمسات (حدايد) واكثر الحلاو قرطاسه طاير مادري وين او الحلاوة مكسرة والكاكاو ذايب حده وراد متيمد سبع مرات :)
الشي اليديد هالسنة ان بنتي الجميلة تبي تروح تقرقع بس بشرط او يمكن شرطين او ثلاثة او اكثر :
1. ماتبي تلبس بخنق لان تقول ان يقزز ويهها (وجهها)
2. ماتبي تلبس دراعة لان الدراعة ماتخليها تقدر تركض وتتكوكس (تتشقلب) على راحتها
3. ما تبي تغني لان مو حافظة الاغنية وتستحي اصلا انها تغنيها
4. ماتبي تروح مع عيال اختي لانها تخاف الحرامي اللي بالشارع ياخذها وتبيني انا اروح معاها
5. تبي تلبس لبس الرياضة مال الروضة لانها تحبه وتبي تحر اليهال فيه ( شورت اسود وبلوزة بيضة)
6. تبي تاخذ معاها من القرقيعان اللي انا تعبانة وامسويته عشان نوزعه علي عيال عايلتنا وتبي توزعه على اليهال اللي راح تشوفهم بالشارع
قرقيعان مشروط والشروط لاتقبل المناقشة ولا التعديل
الموقع ادناه
سمو الجميلة حفظها الله

Saturday, October 15, 2005

اصحى يا نايم


اليوم الصبح كنت بروح السوق اخلص اغراض القرقيعان والعيد ومريت عالبحر وشفت اللي قاعد يصير هناك
مسخـــــــــرة

Sunday, October 09, 2005

مشاري العفاسي جزاه الله خيرا


ودي اسمعكم نشيدة لمشاري العفاسي وايـــــــــــــــــــــــــــــد حلوة وتأثر وايد سمعتها في احد البلوجات المصرية بس مو عارفة شلون احطلكم اياها عشان جذي بحطلكم اللنك وانتوا سمعوها, عنوانها:
ايا من يدعي الفهم:
http://www.anashed.net/anashed/ashretah/oyoon_al_afa3y.html

Saturday, October 08, 2005

اللي يعيش ياما يشوف


يمعة رمضان لها طعم خاص غير كل اليمعات الثانية طول السنة, يجتمع فيها الكبار مع الصغار والسهر يحلى مع الحلو والكنافة والقهوة العربية وساعات ناكل هريس مال الفطور بعد .نشوف ناس من زمان مو شايفينهم وهم نشوف ناس مانعرفهم ونتعرف عليهم في هالشهر الحلو اللي مو امخربة غير المسلسلات اللي مالها معنى>>>>مابي اتكلم عن هالموضوع لان ماراح اخلص.

المهم هالسنة واحنا متيمعين في بيت يدتي العود شفت شي اول مرة اشووووفه, دق جرس الباب والا وحدة منقبة ولابسة خوش عباية وريحة البخور تفوتح منها( بخور غالي مو معمول),

السلام عليكم

عليكم السلام

جان تقول ممكن ادخل؟؟؟!!!!

اي تفضلي حياج الله:)

دشت البيت وكلنا قاعدين قعدت تسولف عن رمضان وان رمضان اول احلى من الحين وسوالف وايد وكل واحد من القاعدين عباله ان هالمره رفيجة احد من القاعدين الثانيين!!!

لكن مع المدة بعد العصير والحلو والقهوة ( مرة ثانية) يعني تقريبا عشر دقايق الكل اكتشف ان محد يعرفها!!!

جان يدتي تقول حياج الله يابنيتي (يعني عشان تتكلم وتقول اشسالفتها), جان تقول انتوا ناس اياويد والحين شهر الخير والكرم والعطاء!!!

جان نطالع بعض ونقول اكيد هذي مندوبة من احدى هاللجان الخيرية وياية عشان تلم فلوس حق الفقارة والمساكين يعني افطار صائم وهالسوالف

تعجبنا!!!

خليناها تكمل كلامها جان تقول

انا مرة مطلقة وعندي اربع يهال موقادرة اصرف عليهم وعلى مدارسهم وعلى طلباتهم!!

اوخ هذه طلعت تلم حق روحها

انا طالبتكم طلبة انكم ماتردوني وايدي خالية

!!!!!

وقامت تبجي

طبعا لبسها الكشخة والكحل اللي بعيونها مايعطي مو لايق كلش مع التمثيلية, بس احنا كملنا معاها التمثيلية وكل واحد طلع من مخباته المقسوم وعطاها.

اهني عاد المفاجأة!!!!!!!

شافت الفلوس بيدها جان تقول: اشوية!!!!!!!!!!

هذول مايكفون حتى حق فطور يوم واحد(مع ان اللي بيدها يعادل قيمة افطار صائم حق عشر ايام على حساب بيت الزكاة في الاعلان)

احنا هني كان يبيلنا صورة وزوووووم على ويه كل واحد فينا

جان تقول بيت ايرانكم كل واحد فيهم عطاني عشر دنانير!!!

انا شفت نصب وجذب بس جذي عمري ماشفت لا وبرمضان بعد!!!

يدتي طبعا حلت الموضوع وقالتلها الله يعطيج انشالله الله ماينساكم انشالله برمضان واطلعت من البيت ومو عاجبها الوضع!!!

صج لي قالوا اللي يعيش ياما يشوف

Wednesday, October 05, 2005

كل عام وانتوا بخير


جربتوا تروحون الجمعية الظهر الساعة وحدة او وحدة ونص؟؟؟؟
نصيحة!!!! لاتجربون

Sunday, October 02, 2005

يؤلمني


تؤلمني كثيرا اثارة الفتنة المتعمدة في بعض البلوجات العربية
.
.
.
.
.
.
.
.
.
.
يؤلمني كثيرا سرقة بعض البوستات ولصقها في بلوجات اخرى بدون توضيح ذلك
.
.
.
.
.
.
.
.
.
يؤلمني كثيرا رؤية بعض الشباب المسلم في الغربة......يعيش هناك لفترة فينسى دينه وينسى ربه
.
.
.
.
.
.
.
.
.
.
يؤلمني كثيرا التفاتنا الي تفاهات الاخرين ونسياننا لتفاهتنا التافهة
.
.
.
.
.
.
.
.
.
.
.تؤلمني وتؤلم الجميع اثارة الفتنة المتعمدة في بعض البلوجات العربية