Thursday, February 16, 2006

افتقدتكم



محطات افتقدتكم فيها
.
.
.
.
.

الا محمدا:
شعار الا محمد اعتقد انه لاينطبق على بعض الافراد في شعوبنا المسلمة العربية الحديثة فبعضهم اساء الى الرسول (ص) اولا.
كيف؟؟؟
رأي خاص وشخصي احتفظ به لنفسي منعا للنقاشات الحادة
هل أخطأت الصحيفة بنشر مثل هذه الصور؟؟
نعم هي أخطأت مع الناس الخطأ وستدفع الثمن غاليا.
لكن من هو الشخص العبقري الذي فكر باقامة مسابقة للرسوم الكاريكاتيرية المضادة في ايران؟!!!!
انها تفاهة غير متوقعة


السنة الهجرية الجديدة 1427:
اخر مرة كتبت فيها التاريخ الهجري كنت في المتوسطة كانت سنة 1412 وقبل جم سنة لما سألت عن التاريخ الهجري كانت السنة 1422. انصدمت!!!!!


العاشر من محرم الحرام:
لايوم كيومك يا حسين



امير القلوب:
هو من ابدع كويتنا بشكلها الحالي ولا اعتقد اننا سنرى مبدعا آخر نعشقه ويعشقنا كما فعل هو.
رحمه الله واسكنه بجانب الصديقين والصالحين في جنات النعيم.



مسيرة بابا جابر:

اعجبني في المسيرة:
مشاركة الجاليات المختلفة في المسيرة
مشاركة الناس من كل الاعمار حتى الكبار في السن

لم يعجبني في المسيرة:
مشاركة فئة معينة من الشباب والشابات تحب التجمعات لأغراض مختلفة عن الجو العام
سقوط احدى المشاركات مغشيا عليها والتفاف الشباب حولها " للتطمش" . اذا كان هذا هو هدفها من " الطيحة" فقد حققته بنجاح باهر ومنقطع النظير.


رحلة الى السبعينيات:
رحلة رجعتني الى السبعينيات من الزمن, مرينا يم (بجانب) الابراج واصرت بنتي الجميلة على ان ندش نشوف الابراج من داخل. يمكن كانت اخر مرة دشيت فيها الابراج من 15 سنة تقريبا او اكثر بعد
حجزنا التذكرة وانصدمت من سعرها, دينار واحد فقط لاغير. المهم دخلنا البوابة الرئيسية ومشينا مسافة طويلة على ما وصلنا واخيرا صعدنا الاصنصير ( المصعد الكهربائي) !!!! حسيت وقتها جني ( وكأني) ركبت الة الزمن الاطار ذهبي واضاءة لونها اصفر .
وصلنا الي الكرة اللي يكون جزء من ارضيتها يدور!!!! الكراسي قديمة والدرايش المفروض انها نظيفة والكافتيريا الواحد يخاف ياكل منها حتى الهندي المسكين اللي يبيع في الكفتيريا قديييم تسريحته وبدلته, ماكنت استبعد وقتها ان يطلعلي الفيس بريسلي فجأة من
بين العواميد الخايسة الذهبية او يغني على السلم واهو ماسك الدرابزين ذو الكور الزجاجية.

ادعوكم لزيارة ابراج الكويت المعلم السياحي الوحيد في الكويت.
او ربما ......لا ادعوكم


البر:
وناااسة اول مرة اروح البر وابات هناك, بتنا 3 ايام ركبنا البجي (دراجة نارية للبر) والحمار والوانيت, لعبنا كرة طائرة وبينج بونج, طبخنا مع بعض شوينا وسهرنا. تهاوشنا وتغشمرنا وضحكنا .
ذكرتني هالرحلة بيمعتنا( جمعتنا) ايام الغزو كانت ايام حلوة على الرغم من مرارتها.


شباب عالهوا:
برنامج يعرض على الام بس سي عند منتصف الليل
اتابعه لاني اكون دايخة ومخي يستقبل كل شي في هذا الوقت من اليوم
اكثرهم ماعندهم سالفة بس في بعضهم اوكي وممتازين
ساعات لما احس اني فاضية وماعندي سالفة اتابعهم

15 comments:

متفرغ said...

الحمد لله على السلامة.... صج احداث وايد صارت في هالفترة انشالله بقية هالسنة تكون سنة خير علينا :)

Babby said...

7amdilla 3ala el salamaaaaaaaa :))

wainich .. o0 esh hal ghaiba :S miss your stories !! & waitting for the takmela .. on a fire :D endemajt 7ady fehum.. :P

Sally W said...

If the universe did start with a bang - when God loved and the angels sang - one of the sparks that flew - chased time to become you :) xaNax

willy said...

we are wating ...
we are interesting ...
we are dying ...
for the naxt part:(
:)

EsTeKaNa said...

ياها ويا مرحبا يا الغاليه
نورت البلوقات برجعتج
عليج بالعااااافيه دامج استانستي
وابراج الكويت تكسر خاطري تصدقين؟
اهم شي لا تخلون شي بخاطر بنوتج الحلوة:)

نون النساء said...

فقدناج شتور بصراحه

:*

وان شاء الله اتعوضين المحطات اللي طافتج بمحطات اجمل


.
.
.

اول مرة بحياتي اركب بانشي السنة هاذي بالبر
بس سكتي والله راح صوتي من كثر لصراخ
وبعد مو انا اللي كنت اسوق لوووووووول

وماكنت ماخذه راحتي كنت مستحية من الشباب
&^_^& عاد ما يدصقون على الله يلاقون شي يتطنزون عليه




الابراج وييييييييييه
خبري عتيج عنها اخر مرة زرتها كان عمري ستعش سنة
قبل ثمان سنوات تقريبا

بس لي فيها صورة كان عمري سبع سنوات
لابسة دراعه ومصورة انا وابوي وعمي
امبيييييييه كل ما اشوفها اقول حق امي الله يهداج يمه
دازتني الديرة بدراعه
وين قاعدين احنا
هههههههههههههههههههههه

kazmawy said...

عليج بالعافيه
مشتاقين
:)

طائر بلا وطن said...

welcome back :)

مرحبا فيج من يديد اخت عزيزة

و انشالله هالسنة تكون احلى و بمحطات
أحلى و أجمل يا رب

chatterbox said...

متفرغ:
الله يسلمك :)
وانشالله الله يسمع منك , مع ان بدايتها ماتبشر بالخير بس الله كريم انشالله:)


babby:
الله يسلمج
so you miss my story,i miss it too and i hope that i can write the fourth chapter soon :)
o thanks

chatterbox said...

willy:
شكرا
انت قول انشالله بس
الله كريم :)


استكانة:
هلا والله
ودام انتي موجودة اكيد البلوجات بتنور
والله يعافيج
واحنا مو ذابحنا غير هالبنوتة الدلوعة طلباتها اوامر :)



ننون:
انا فقدتكم اكثر :) وانشالله معاكم المحطات بتكون احلى واحلى واحلى
.
.
واشدعوة انا اللي كنت سايقة البانشي
لو انا اللي سايقة جان صارت بلاوي لوووووول
.
.
لووووووووول دراعة عاد؟؟؟!!!؟؟
لا ووقتها كانت الابراج زحمة و ناس وعالم وانتي رايحة بدراعتج؟!!!!!!
لوووووول

chatterbox said...

كظماوي:
الله يعافيك :)
واحنا مشتاقين اكثر حق سوالفك:)


طائر:
الله يسلمك :)
وانشالله تكون احلى مع ان السنة اللي طافت كانت الحمدلله وايد حلوة بالنسبة لي.

3ateeja said...

كل شي بصوب ورحلة الابراج بصوب ثاني

لا تعليق

mashi_97 said...

الحمدلله على السلامة
من جد طولتي
على العموم الحمدلله على السلامة
والمهم انج في صحة وعافية

Q8ya said...

المركز العلمي بعد من المعالم السياحية بالكويت...^___*

chatterbox said...

عتيجة:
لا تعليق :)



ماشي صح:
الله يسلمك :)
اي والله طولت وايد
وانشالله ما اضطر اني اطول مرة ثانية
ومشكوووووور :)



كويتية:
صح المركز العلمي حلو وايد ومعلم سياحي مميز وايد وايد وايد
بس ممل
يعني من اول ما فتح لي الحين ما تغير فيه شي
اللهم الا الافلام اللي بالسينما تتغير كل فترة
الاكواريوم وقاعة الاستكشاف حلوييين وايد, بس مافيهم شي يديد يعني تروحين مرة مرتين وخلاص.