Saturday, May 27, 2006

محتارة :(


فجأة وبدون مقدمات حصلت على عرضين للعمل بعد ماكنت اطر من الديوان طرارة الحين صار عندي عرضين لا ولي حرية الاختيار لمكان العمل
العرض الاول من مستشفى المواساة:
المميزات
مكان العمل ممتاز جدا
المعاش اكثر من الحكومة بمئة دينار
المسؤؤل دكتور هندي طيب جدا جدا
نوعية الشغل وايد حلوة ومافيها روتين يومي
المساوىء:
الدوام شفتات يعني في مرات يكون الدوام لي الساعه 11 بليل واذا كان الشفت صباحي يكون الي الساعه 3
مدير المستشفى بحد ذاته يعتبر نقطة سلبية
السالمية بعيدة عن بيتنا وايد وتخيلوا اني ساعات راح اكون طالعة بلليل متاخر
الشغل ماراح يكون بمجال دراستي ابدا
ماراح اتمتع باجازات العيد والعطل الرسمية حالي حال خلق الله
في دوام يوم الخميس واحيانا الجمعة
العرض الثاني من وزارة الصحة:
المميزات:
الدوام الي الساعة الواحدة والنصف فقط
عندي حرية الاختيار للعمل في اي مستشفى من المستشفيات في اي منطقة
الدوام سبهللة يعني فلاتي يعني اداوم على كيفي يعني اجازات العيد والاجازات الرسمية كلها مضمونة والاستئذانات على ماله والي " كثيرة جدا"ء
المكان اللي اخترته اختي ورفيجاتي كلهم يشتغلون فيه ويمنا مجمع تجاري كبير و سووووووق
المسؤول رفيج ابوي
نوعية الشغل _ان وجد_ تتوافق تماما مع دراستي
المساوىء:
روتين قاتل, ذباح و فتاك
مكان العمل غير مناسب للكائنات الحية ماعدا الكائنات اللاهوئية_ اي التي لاتحتاج الي الهواء الجوي لتعيش_وبدون مبالغة
قهوة وشاي وسوالف ومناجر وهواش وخناق طوال اليوم بسبب انعدام الشغل
مواقف السيارات غير متوفرة بعد الساعة 7 صباحا
انعدام التقدير للموظف المجتهد وتكريم وترقيه الموظفات الحسناوات او الجياكر اللي عندهم واسطات
يجب توقيع تعهد بعدم الانتقال من هذا المكان بصفة دائمة يعني الي التقاعد وهذا قانون جديد فريش على حظي
اشرايكم انتوا؟؟؟

16 comments:

bo_sale7 said...

السلام عليكم ....

شوفي غيرهم

kazmawy said...

اعتقد المواساة بهذله اكثر..دوام صعب..ومايرحمون الموظف العادة هالاماكن الخاصة ..
الحكومة ..اكل ومرعى وقلة صنعة ..

انصحج..داومى بكل مكان اسبوع تجربة ..وبعديت استخيرى وتوكلى على الله
والله يوفقج
:)

meo said...

"المكان اللي اخترته اختي ورفيجاتي كلهم يشتغلون فيه ويمنا مجمع تجاري كبير و سووووووق
"

اتوقع من هالجمله انتي قررتي و خلصتي
دام الفرق 100 دينار ما تسوى
و اذا ما يقدرون اللي يشتغل بنفس الوقت ما يعاتبون اللي ما يشتغل
يعني اذا صار لج خاطر اشتغلي

maha said...

ماخاب من استشار
ولا ندم من اسخار


لا تنسين صلاة الاستخارة

:)

الاء سعود المجيبل said...

مع ان الاثنين اشوفهم مو شيء لاني ما احب وزارة الصحه خير شر لاني كنت راح اشتغل فيها والحمد لله ما صار نصيب ومكاني الحين احسن بوااايد واهم شيء انهم اهما اللي نادوني ...^___*


اقولج استخيري احسن لج واهم شيء ترى راحتج بالمكان والشغل بعد ....:)


موفقه...^___*

SAJA.S said...

اضم صوتي مع الباجي ... احسن حل استخيري

mashi_97 said...

بصراحه وبكل أسف
المكان الثاني أفضل
خاصة أنتي أم وعندج عيال
والمية دينار اتوقع ماتفرق واجد
والمستشفى مهمـا ترقيتي أجل راح توصلين
أنـا برأيي تأخذين الوظيفة وتجلسين عندهم كم سنة تأخذين خبرة عشان حتى لو قدمتي مكان ثاني يكون عندج خبرة وأتوقع الدوائر عندكم زينـا في السعودية مايهمه وين اشتغلت وهل تعبت أو لا
يهمه بس كم عدد سنوات الخبرة اللي عندك
وهذا مجرد رأي
وزي ما قالوا الجماعه
الله الله بالإستخارة وماخاب من استخار

G.C.C.United said...

عن نفسي لا أحب العمل الحكومي و أبغضه كل البغض لعدم الأنتاجية و لحكر مواهبي ... لا أعرف ظروفك و أنصحك ليش ما تصلين صلاة أستخارة يمكن الله يرشدك للي فيه خير لك ان شاء الله .. نتمنالك الخير و السداد

Nooni said...

almowasah

Anonymous said...

ما يبي لها حكي
الحكومة

و بعد كم سنه لا طاب خاطرك قدمي استقاله مو نقل

Ra-1 said...

definitely private sector!
المواساة :)

enter-q8 said...

حجية

مع احترامي لكل الاخوان محد راح يقدر يفيدك

الامر يعتمد على

طموحك شنهو

فقط لاغير

3ateeja said...

والله يا وخيتي طلبتي رايي ورايي ان الدوام الثاني مقبره مو داوم وسجن ..وما يتسمى دوام ..
العرض الاول افضل
وحاولي تشوفين عرض ثالث ترى فرص العمل وااايد بس تبي اللي يدور ..تذكرين شكثر نشفت ريجج المره اللي طافت اظن :)

ii said...

النقطة الاخيره من العرض الثاني .. صعبه شوي يبيلك توقفين عندها!!

فكري زين .. وش العرض اللي يناسب ظروفك

بالتوفيق .. تستاهلين كل خير
:)

chatterbox said...

laialy:
thank you :)



bo-sale7:
:)
فكرة



كظماوي:
الاكل والمرعى وقلة الصنعة اهي الشغلات اللي بالضبط بالضبط انا ما ابيها
وعملت بنصيحتك لان الواقع غير الكلام واستفدت وايد
مشكوور


meo:
كنت اقصد من هالجملة المستشفى اللي اخترتها من وزارة الصحة لاني كنت قاعدة اسوي اوراقي في الجهتين
بس هم عجبتني وجهة النظر يعني اذا بشتغل راح اشتغل حق روحي مو عشان احد خووووش حجي عجبني :)



مها:
هلا وغلا
وعاش من سمع هالصوت :))
ما نسيت والحمدلله ارتحت :)
مشكوورة

chatterbox said...

كويتية:
حتى انا مو عاجبتني ولا احبها بس هم الحمدلله
والله يوفقج :)


smile:
:) شكرااااااا


ماشي:
هلا والله :)
انت قلتها بصراحة وللاسف لكن اللي امريحني اني مؤمنة بان الله سبحانه وتعالى دايما يختارلي الافضل :)



GCC UNITED:
اي والله وانا ابغضه بعد كل البغض بس الحمدلله كنت متوقعة ان يكون الشغل ملل اكثر من جذي بالعكس انا مستانسة وايد منه يمكن لاني استخرت وبعدين قررت ؟ اكيد مو يمكن :)



judy:
اهيء اهيء اهيء
كان ودي :)



anonymous:
اتوقع جذي



Ra-1:
هلا والله:)
كان هذا بالضبط اختياري بس الحمدلله على كل حال:)



enter-Q8:
بس مو شرط اللي عنده طموح وعنده ارادة راح يحقق طموحه في اي مكان بس بعض الاماكن يبيلها وقت وتعب
وبعض الاماكن تقتل الطموح وقتها تقدر تحقق طموحك في المجال اللي تحبه بس بره الشغل يعني تتاقلم مع الوضع وتحاول كثر ماتقدر
والله كريم:)



عتيجة:
هلا وغلا :)
ادري بس حال العرض الثاني اهو تقريبا حال معظم الوزارات الحكومية عندنا اهني والعرض الثاني ممتاز جدا جدا جدا بس المشكلة في اوقات الدوام مااقدر عليها وبعدين انا سويت استخارة
بس مااعتقد كان في مجال انطر عرض ثالث لان نطرت وايد وخلاص مافي وقت راح اوصل سن التقاعد وانا بعدني ماتوظفت :))

واتذكر لما نشفتي ريجي المرة اللي طافت بس تنشيف ريج عن تنشيف ريج يفرق وانتي تمونين ومثل اختي :)



سعلوة:
هلاااااااااا
عاش من شافجج :)
المشكلة ان العرض اللي يناسب ظروفي ابدا ابدا ابدا ما يناسب طموحي
بس يله ربنا يقدم اللي فيه الخير :)
والله يوفق الجميع ومشكوووورة