Saturday, October 08, 2005

اللي يعيش ياما يشوف


يمعة رمضان لها طعم خاص غير كل اليمعات الثانية طول السنة, يجتمع فيها الكبار مع الصغار والسهر يحلى مع الحلو والكنافة والقهوة العربية وساعات ناكل هريس مال الفطور بعد .نشوف ناس من زمان مو شايفينهم وهم نشوف ناس مانعرفهم ونتعرف عليهم في هالشهر الحلو اللي مو امخربة غير المسلسلات اللي مالها معنى>>>>مابي اتكلم عن هالموضوع لان ماراح اخلص.

المهم هالسنة واحنا متيمعين في بيت يدتي العود شفت شي اول مرة اشووووفه, دق جرس الباب والا وحدة منقبة ولابسة خوش عباية وريحة البخور تفوتح منها( بخور غالي مو معمول),

السلام عليكم

عليكم السلام

جان تقول ممكن ادخل؟؟؟!!!!

اي تفضلي حياج الله:)

دشت البيت وكلنا قاعدين قعدت تسولف عن رمضان وان رمضان اول احلى من الحين وسوالف وايد وكل واحد من القاعدين عباله ان هالمره رفيجة احد من القاعدين الثانيين!!!

لكن مع المدة بعد العصير والحلو والقهوة ( مرة ثانية) يعني تقريبا عشر دقايق الكل اكتشف ان محد يعرفها!!!

جان يدتي تقول حياج الله يابنيتي (يعني عشان تتكلم وتقول اشسالفتها), جان تقول انتوا ناس اياويد والحين شهر الخير والكرم والعطاء!!!

جان نطالع بعض ونقول اكيد هذي مندوبة من احدى هاللجان الخيرية وياية عشان تلم فلوس حق الفقارة والمساكين يعني افطار صائم وهالسوالف

تعجبنا!!!

خليناها تكمل كلامها جان تقول

انا مرة مطلقة وعندي اربع يهال موقادرة اصرف عليهم وعلى مدارسهم وعلى طلباتهم!!

اوخ هذه طلعت تلم حق روحها

انا طالبتكم طلبة انكم ماتردوني وايدي خالية

!!!!!

وقامت تبجي

طبعا لبسها الكشخة والكحل اللي بعيونها مايعطي مو لايق كلش مع التمثيلية, بس احنا كملنا معاها التمثيلية وكل واحد طلع من مخباته المقسوم وعطاها.

اهني عاد المفاجأة!!!!!!!

شافت الفلوس بيدها جان تقول: اشوية!!!!!!!!!!

هذول مايكفون حتى حق فطور يوم واحد(مع ان اللي بيدها يعادل قيمة افطار صائم حق عشر ايام على حساب بيت الزكاة في الاعلان)

احنا هني كان يبيلنا صورة وزوووووم على ويه كل واحد فينا

جان تقول بيت ايرانكم كل واحد فيهم عطاني عشر دنانير!!!

انا شفت نصب وجذب بس جذي عمري ماشفت لا وبرمضان بعد!!!

يدتي طبعا حلت الموضوع وقالتلها الله يعطيج انشالله الله ماينساكم انشالله برمضان واطلعت من البيت ومو عاجبها الوضع!!!

صج لي قالوا اللي يعيش ياما يشوف

10 comments:

Delicately Realistic said...

E i know. I7na ba3ad cham mara yayeena ilbait for the same reason.
I have a rule, if they stoop low enough to beg then they really do need the money, either on a material level or a mental level.
:(

mashi_97 said...


لووووووووووووول
هذه والله من جد قويه
شينه وقوية عيـــن
هذا لو أنـا شايفه في مسلسل كانت قلت يبالغون
والله زمن العجايب!!
عاد أنتوا ماعندكم وحده تشوتها بالجزمه؟؟

chatterbox said...

d.r:
حتى انتوا :) يعني منتشرة السالفة ماشالله الديرة سايبة. بس نظريتج حلوة:)


ماشي:
اي والله زمن العجايب, عاد تصدق يتني هالفكرة بس قلت احترم نفسي واحترم يدتي عالاقل لان اذا سويت جذي يدتي راح تشوتني انا وراها لووووووووووووول

الطارق said...

مرت علينا نفس السالفة بس احنا احكتشفنا الموضوع من البداية ، ومن باب البيت قلنا الله يعطيج .

سبحان الله ، لازم الواحد يحمد ربه على العافية وعلى عزة النفس ، وخلوني أقولكم معلومه حلوه و فقهية ، تدرون أن الواحد إذا كان مع مجموعة واهو ما عنده ماي ، يتيمم ولا يطلب ماي حق الوضوء ، كل هذا عشان الإسلام يحفظ للمسلم عزة نفسه وما يخليه يطلب من أحد شي يمكن يزفه وما يعطيه .

بس شيفهم الناس ويوعيها ؟!

Broke said...

في وحدة يت حق أمي الصبح مشككة روحها بالذهب ..أمي يوم شافتها ما استوعبت انها طرارة ..على بالها وحدة ياية تخطب

:P

بس .. والله هذي ما تستحي شنو هالجرأة ..صج لي قالوا طرارة واتشرّط

Ahmed Shokeir said...

طبعا انا فهمت الموضوع بالعافيه علشان اللهجه .. بس الغريب إنها إستقلت المبلغ اللى أخدته .. إحنا الشحات يستحى ينظر للفلوس ويحط فى جيبه على طول

يعنى إيه طرارة؟

chatterbox said...
This comment has been removed by a blog administrator.
chatterbox said...

الطارق:
حتى انت بعد والله طرطرة:) وانا عبالي هذي موديل هالسنة طلعت قديمة لووووووول. اي والله الحمدلله على العافية وعزة النفس بس المشكلة انها مو محتاجة ليش تسوي جذي؟؟؟.
ملاحظة: السؤال اللي اخير شي مافهمته :).



Broke:
لوووووووووووول ياية تخطب.
اصلا اهي لة تستحي ماتدخل بيوت ناس ماتعرفهم هذي طرارة هوم ديلفاري :).



احمد:
اسفة المرة الياية انشالله راح احط ترجمة بين قوسين لان ادري لهجتنا صعبة ويبيلها مترجم:)
الغريب مش انها استقلت المبلغ لأ الغريب انها بتعد الفلوس أودامنا (امامنا) والشحات اللي يستحي يبص للفلوس ده شحات حقيقي بس دي
شحاته (في آي بي) لووووووووول

طرارة( مع الشدة على الراء الاولى) = شحاتة(مع الشدة على الحاء)

طرارة(بدون الشدة)= اسم الفعل :)



وشكرا على المروووووووووور

~ se3loah ~ said...

ياما بتشوفين برمضان من هالاشكال
وبالمساجد بعد انواع التأليف والنصب ويتفاولون على انفسهم بعد
يعني خلاص ما صار فيه خوف من الله

chatterbox said...

اي بالمسجد ممكن بس هذي داشة عندنا البيت. الله يهديهم بس زين بعد مو يايبة وياها ياهل مريض والا امشربة ولدها شي عشان يخدر ويايبته معاها وتقول ان مريض في ناس صج صج صج مايخافون من الله.