Sunday, September 11, 2005

هل تحبني ام لا؟؟؟






امس كان عندنا استعدادات و عفسة والقوات الداخلية اعلنت استنفارها من الدرجة الثانية وتأهبها لأي طارئ ليش؟ لان امس كان اول يوم حق بنتي بالروضة اول سنة والكل مستانس ومتحمس والكل يزهب ملابسها وجنطة اكلها وتكرمون جوتيها واهي طايرة من الفرحة مو قادرة تنام جنه باجر عندها عيد.
المهم
نامت بعد عناء واستيقظنا في الصباح الباكر ونحن شاقين حلجنا من الوناسة بس كنت احاتي انها راح تبجي لما اخليها واروح ورحنا بعد ما اخذنا لها جم لقطة بالكاميرا مع كل واحد بالبيت ومع السيارة ومع الباب ومع الخدامة وكله :)
المهم دخلنا المدرسة والا في صبي مسكين ابوه قاطه ورايح والولد مسكين يبجي وماسك الباب يبي يطلع والابلة تعطيه حلاو وهو يعيط والناظرة تسولف معاه واهو يعييييط والوكيله صارتله ارجوزة وهو يعيييييييط. انا شفت جذي قلت الله يستر
وديتها الصالة ( يسمونها قاعة الالعاب الحركية)عشان تشوف ابلتها الحلوة اللي تحبها وساحلتها وسولفت معاها عشان تتعود عالمكان بس اشوفها عادي تسولف معاي ومع الابلة ومع اليهال !!!!
وقامت تلعب وهدتني !!!
لحظة...... اهي مو المفروض تبجي وما تبيني اروح؟ والا شنو؟؟
تبون الصراحة يتني البجية ليش بنتي ما تبيني وما تبجي نفس باجي اليهال؟
قلت خل اسوي روحي بروح واخليها يمكن تستوعب, بس ماكو فايدة قالتلي بــــــــــــــــــــــــــــــاي ماما !
طلعت وركبت السيارة ومشيت بس ما قدرت اكمل رجعت الروضة اتأكد ان اهي عادي عندها
وهم ماكو فايدة قاعدة تلعب عادي
رجعت المنزل اجر اذيال الخيبة رجعت ودمعتي ساخنة على خدي هل انا ام شريرة؟ هل تحبني ابنتي ام لا؟
.
.
.
.
.
.
.
.
.
.
.
يتبع

8 comments:

حسن الخزاعي said...

يمكن ما تحبش، ما فيها شي عادي:P

mashi_97 said...

أقول انتبهي لأبنتج
السالفة أكبر من أنها تحبج أو لا
الظاهر أن بنتج شافت لهـا ولد حلووو
لووووووووووول
:)

chatterbox said...

حسن:
يمكن ليش لأ, بس اقرى البوست الياي وانت تعرف اشصار ومشكور.

ماشي:
لووووووووول اتصدق؟ يمكن, اتسويها لووووول

der Nachbar said...

I don´t unterstand anything! What does it mean? By, Chris

chatterbox said...

its kuwaiti accent :)

Ahmed Shokeir said...

إحساس فعلا صعب ، الله يكون فى عونك بس الشيئ الجيد فى هذا الموضوع إنتباهك لهذا الشيئ ..عموما أهالى تانيه كتير تتمنى أن يكون أبنائهم بنفس سلوك بنتك
باين عليها هاتطلع شخصيتها قويه وإجتماعيه
ربنا يخليهالك

chatterbox said...

طبعا اتمنى لها ان تكون شخصيتها قوية بس انا اتأثرت لان ماتوقعت هالشي

chatterbox said...

نسيت اقولك مشكور :)