قرقيعان وقرقيعان بيت قصير ورميضان عادت عليكم صيام كل سنة وكل عام الله يخلي بنتي الله يخلها لامها عسى البقعة ماتخمها ولا تواسي على امها
سلم ولدهم ياله خله لامه ياله
ويص ويص في بيتكم جعاميــــ...... :)
بما ان احنا ساكنين في منطقة اكثر سكانها عيايزو شياب عشان جذي القرقيعان عندنا مو متطور نفس باجي المناطق يعني وين و وين تلاقي بيت يعطونك حلاو وكاكاو يديد مو محزر , وفي بيوت حاطين خردة مع المخلط ( المكسرات) عشرينات وخمسات (حدايد) واكثر الحلاو قرطاسه طاير مادري وين او الحلاوة مكسرة والكاكاو ذايب حده وراد متيمد سبع مرات :)
الشي اليديد هالسنة ان بنتي الجميلة تبي تروح تقرقع بس بشرط او يمكن شرطين او ثلاثة او اكثر :
1. ماتبي تلبس بخنق لان تقول ان يقزز ويهها (وجهها)
2. ماتبي تلبس دراعة لان الدراعة ماتخليها تقدر تركض وتتكوكس (تتشقلب) على راحتها
3. ما تبي تغني لان مو حافظة الاغنية وتستحي اصلا انها تغنيها
4. ماتبي تروح مع عيال اختي لانها تخاف الحرامي اللي بالشارع ياخذها وتبيني انا اروح معاها
5. تبي تلبس لبس الرياضة مال الروضة لانها تحبه وتبي تحر اليهال فيه ( شورت اسود وبلوزة بيضة)
6. تبي تاخذ معاها من القرقيعان اللي انا تعبانة وامسويته عشان نوزعه علي عيال عايلتنا وتبي توزعه على اليهال اللي راح تشوفهم بالشارع
قرقيعان مشروط والشروط لاتقبل المناقشة ولا التعديل
الموقع ادناه
سمو الجميلة حفظها الله
11 comments:
أنا أقول خليها تستريح بالبيت أحسن
:P
ديري بالج ..لا تعطينها ويه زيادة عن اللزوم .. ترى باجر تاكلينها
والله يخليها لج ان شاالله
ياحبيلها تجنن بنتك ما شاء الله
يختي وش هالدلع ترا بكرا بتتعبين معها والله
احد يروح يقرقع بملابس رياضه؟؟؟
حنا القرقيعان عندنا بشعبان انتم ليش برمضان؟؟
لوووووووول
بصراحه شروط صعبه
شكل بنتج مدعومة من البيت الأبيض
لكن إذا مش حافظه الأغنيه ، أيش ناويه تغني ؟
يمكن أغنية من أغاني شعبولا.
الله يحفظها لج ويبارك فيهـا
وكل قريقعان وأنتم بخير .
ماشي صح
هاهها الله ايحفظها :)
أحب الحلاو إلي بالصورة!
One of my favourites n_n
أعتقد إنى علقت مرة قبل كده على قوة شخصيتها .. ودلوقتى ملاحظاتك بتأكد نفس الكلام
عجبتنى ملاحظه الحرامى اللى فى الشارع
وكمان أول مرة أعرف معنى كلمه لوحدى .. قرقيعان
هاهاها يسلم قلبها والله .. خليها إذا كلش كلش تشيل مسجلة فيها إغنية لقرقيعان و تشغلها عند البيوت .. الله يخليها لج
nice post
i tagged u ;-p
زوووغة مشاءالله
الله يحفظها و يخليها لج
:)
ربنا يخليهالك
و متشكرين إنك حاطة ترجمة
:0)
بس عاوز أعرف هو إيه القريقعان ده أساسا
:0p
علي حد علمي دي النسخة الخليجية من وحوي يا وحوي
broke:
لا لاتخافين ما راح اعطيها ويه واذا ما عجبها الوضع راح اخليها تقعد بالبيت وادري انها راح تستسلم للامر الواقع وراح تروح تقرقع بس بشروطي انا :)
سعلوة:
الله يسلمج مشكورة.
احنا بالكويت اول كان عندنا قرقيعان بشعبان وقرقيعان برمضان بس الحين اكثر الناس يسونه برمضان :)
بس يعني انتوا ماتسون قرقيعان برمضان؟؟؟؟
ماشي:
اي والله بعد شنسوي عيال اخر زمن :)
بس حسافة اهي مو حافظة الا اغاني سبيس تون space toon
يتراوالي مو لايق مع القرقيعان تغنيلهم :
من يعرف كيف يكون محبوبا بين الناس :)
R1:
الله يسلمج:)
احلى حلاو انا احبه بعد واكو منه على شكل سوار يوم كنا صغار كنا ناكل الحلاو واحنا لابسينه على ايدنا وشوفي عاد السعابيل لي وين توصل لووووووووول
احمد:
الحمدلله ان طلعت قوية مو نفسي الحمدلله .
كلمة قرقيعان هي الكلمة الوحيدة اللي نسيت اترجمها الحمدلله انك عرفتها لوحدك :)
مساعد:
اولا حياك الله في البلوج :)
الله يسلمك مشكور بس عاد مسجلة ماتنفع بفريجنا الصخة والعيايز بيكسرون المسجلة على روسنا لووووووول
mother:
wWwWoOoOoOoWwWw
وناااااسة هيــــــــــــــــــــــا
سوري بس هذي اول مرة :)
مشكورة:)
little:
الله يسلمج مشكوورة وادعولي الله يعيني عليها :)
وش:
ويخليك :)
والترجمة دي عشانكو كلوكو :)
والقرقيعان هي مناسبة بتكون بنص شهر رمضان يلبسوا فيها العيال ملابس جديدة شعبية قديمة وبيمشوا بالحارة ويغنوا اغنية معروفة قديمة اللي في بداية البوست :) والجيران بيفرقوا عليهم شوكولاته وحلويات :)
والظاهر ان احمد فاهم الكلمة دي ابقه اسأله لو عاوز تفاصيل اكثر لاني مش عارفة اشرح اكتر من كده :)
طارق:
شكرا عالزيارة اللطيفة :)
يمكن بس مش متاكدة لاني مش عارفة انتوا بتعملوا ايه في وحوي يا وحوي :)
mr.tea
الله يسلمك ويخليك :)
بس لا ماراح اخليها على راحتها. يعني توزع قرقيعان ميخالف عادي كريمة وطالعة علي مثل ماقلت :)
بس تروح بلبس الرياضة !!!! ماراح اخليها شروطي اهي اللي راح تمشي لووووووول
اسفة جدا جدا جدا جدا جدا عالتاخير لظروف خارجة عن ارادتي ولخلل فني طاريء :)
Post a Comment